2000. urtean jaio nintzen, denok bezala, bihotz taupaden bitartez musika barnean nuelarik. Barnean ez ezik, musika hau kanpoan ere entzun nahi nuen, eta musikaren hizkuntza ikastea erabaki nuen 7 urte nituelarik, baita euskal dantza eta antzerkia ere, arte eszenikoetan nire barneko mundua kanporatu nezakeelako.

Denbora aurrera joan ahala, arte hauekiko interesa handituz joan zen, eta arlo ezberdinei buruz ikasteari ekin nion. Adina eduki nuenean, Dantzertin Arte Dramatikoko ikasketak burutzea erabaki nuen, nirekin hazi eta hazten dabilen barne mundu hori munduari erakusteko moduak ikasi nahian.

Abestien bertsioen bitartez, nire zati bat munduari erakutsi niezaiokeela ikusi nuen, eta 2019.urtean, bizi dugun garai elektronikoa kontuan hartuta, bertsio hauek sare sozialetara igotzeari ekin nion. Gauza batek bestera eraman ninduen, eta bakarkako kontzertuak eskaintzen ere hasi nintzen.

Txikitatik nekarren gustua jarraituz, abesti propioak idazten jarraitzen nuen, eta disko bat grabatzea pentsatu nuen, nire barneko zati hori lekuren batean dokumentatu nahian. Mutrikuko AME Estudioarekin kontaktuan jarri nintzen, eta haren bitartez Iker Laurobarekin. Horrela, Haritz eta Iker Laurobak abestiak apaindu eta gorpuzten lagundu zidaten, eta azkenik hemen da Killasisa, zortzi abestiko diskoa. Zuzenekoei begira, banda bat sortzea erabaki nuen, abestiak kolorez betetzeko, eta hala sortu nuen zuzenekoetan nirekin batera arituko den banda, bateria, baxu, bi gitarrista eta pianistarekin.